JAHOWA DO SIPARMAHAN
HITA (Mazmur 23:1b-6)
Sai manontong do jolma i dibagasan
hahurangan, mauas, jala mabiar dihangoluan on. Mabiar mangadopi ngolu na masa
nuaeng dohot di ari na naeng ro. Sihumisik gabe alasan na jumotjot dihabiari
angka jolma. Godang torop dope angka na asing na dihabiari jolma i ;
parsikkolaan, parkarejoan, parumatanggaon, parsahiton, hamatean dna. Sai
manontong ma jolma i loja manjalahi
hangoluan on. Molo dung dapot sada na ringkot i, ro muse haringkotan na asing.
Sipata hira so diboto be mangadopi parngoluan on. Songoni do tutu ngolu
hajolmaon i, jala ido umbahen jolma i dang hea marnasombu, dang dapotna
hasonangan i. Sai tongtong ibana mauas. Ndang adong rasa cukup dibagasan
rohanta gabe dang boi hita marlas ni roha. Saluhutna ala adong biar. Dibagasan
turpuk on diajarhon parpsalmen on do asa dapotta las ni roha i.
Psalmen 23 on ima panindangion raja Daud
taringot parmahanion ni Jahowa tu dirina. Disarihon Jahowa do saluhut angka na
ringkot dingoluna.
Pardagingon
Ragam do diula jolma laho mandapot angka na
ringkot dihaportibion on. Adong do halak manggogo mangula jala dapot na
jinalahanna, adongdo na so pola gogo mangula jala dapotdo na niluluanna, adong
do halak sai digogo mangula alai otikdo dapotna, jala adongdo jolma i so pola
mangula alai dapotna do na ringkot dingoluna. Dang pola didok raja Daud na gogo
do ibana manang so mangula. Alai na pasti sai dipatongon Jahowa do tu ibana
jampalan angka na lomak, jala sai ditogutogu do ibana tu lambung aek
hasonangan. Singkop situtu do panarihonon ni Jahowa dingolu pardagingan raja
Daud. Sai diboto jala disarihon Jahowa do angka na ringkot bahen hangoluan na
pinarmahanna.
Partondion
Ngolu na rumingkot sasingtongna dang apala
pardagingon, alai partondion i do. Hasabamon ni roha, ido na boi pasonangkon
roha. Dapot ni jolma i hasabamon molo olo ibana ditogu/manjalo dalan hatigoran
(parbinotoan na sintong). Hatigoran ima parbinotan taringot hangoluan. Ingkon
botoon do aha naringkot, boha manjalahi, jala mamangke na ringkot i. Jala
saluhutna i hombar tu lomo roha ni Debata. Ima hatigoran ni Debata. Molo diboto
jala diulahon hatigoran i, dapotma hasabamon i. Ido umbahen didok raja Daud
‘dipasabam do rohangku, ditogu do ahu di dalan hatigoran’. Sabam situtu do roha
raja Daud dipanoguon ni Jahowa gabe diantusi raja Daud do angka na ringkot
dingoluna, jala pos do rohana sarihonon ni Debata do i. Sabam ma tutu rohana
mandalani ngolu i. Ganup halak na mangolu dibagasan hatigoran lehonon ni Debata
do hasabamon ni roha. Gariada tahe, halak naung mangolu dibagasan hatigoran,
dang mabiar mardalan di rura linggoman ni hamatean dohot mangadopi angka
parmaraan.
Pardenggan basa do Jahowa
Jolma na gale do si Daud jala jotjot do
ibana mangadopi angka hamaolon ni ngolu, alai margogo do ibana. Ro do paraloan
sian raja Saul na laho mangarongom ngoluna. Sandok, margogo do si Daud
mangadopi sude hamaolon i marhitehite pasahathon dirina tu Jahowa. Ido imbarna
si Daud dohot halak na so marhaposan tu Jahowa. Molo si Daud sai marhaposan tu Jahowa
do ibana, alai halak namangasahon dirina sai tongtong dibagasan biar mangadopi hangoluan
on.
Dang holan pandonganion dohot pangaramotian
dipangkilalaho si Daud, alai dohot do digombarhon na diontang Debata ibana
dibagasan sada pesta. ‘Ho do manutup meja di jolongku maradophon angka
musungku, dimiahi Ho do ulungku, suksuk do panginumanki (ay.5). Diparade Jahowa
do di ibana sipanganon dohot siinumon diadopan ni angka musuna. On patandahon
hamonanganna mangodopi angka hamaolon i jala dipasupasu Jahowa.
Dibagasan pardalanan ni ngolu par-psalmen
on dipangkilalahon ibana do pangaramotiopn ni Debata. Saluhut angka ringkot di
ibana sai tontong dipasingkop Jahowa. Saluhut angka na adong dibagasan
hadirionna diida do i holan ala denggan basa dohot asi ni roha Jahowa.
Jala dang holan
dihangoluan portibi on, alai halak na mangolu dibagasan hatigoran i,
marpanghirimon do na masuhanna sogot bagas ni Jahowa ro di salelenglelengna. Ima
panghirimon dingolu na naeng ro. Saluhut angka pambahenan ni Debata diangka ari
naung salpu i gabe sihirimon dingolu na naneng ro. On ma haporseaon raja Daud : denggan basa
dohot asi ni roha sai jaloonna do. Jala dung salpu ngoluna di hasiangan on,
masuhanna do bagas ni Jahowa i, ima inganan na gok las ni roha si salelenglelengna.
Godang do boban sipingkiran dihangoluan on
jala dang tarelakkon i. Alani i ringkot hita mangalului pangurupion, na boi
mangalehon dalan jala mandongani. Jahowa Siparmahan ahu, ido panindangion si
Daud. Laos ido na patut boi tapangasahon dibagasan ngolunta. Tu Jahowa ido
patut hita marhaposan, jala unang marpangunsandean tu pingkiranta sandiri (Poda
Salomo 3:5). Ditingki ro hamaolon i, ingkon do tapasahat dirinta tu Jahowa.
Ibana do parmahan na satia jala silehon las ni roha. Songon didok raja Daud,
molo Jahowa donganta dang hurangan hita. Ala diboto Jahowa do aha na ringkot
jala na dumenggan di angka na pinarmahanNa.
Godang do angka na ringkot dingolunta jala
diparade portibi on doi. Alai dang saluhut na ringkot ingkon adong, lumobi molo
so tardungdungta. Unang pola biar rohanta marnida angka na masa dihasiangan on,
alai tapasahat ma tontong rohanta tu Jahowa pardenggan basa i. Songon halak na
porsea, mar pos ni roha ma hita na marhagogoon do Jahowa. Dang taboto hagogoon
ni Jahowa i, jala dang adong na boi manaluhon i. Antong pasahat ma dirim tu
Jahowa. Porsea ma hita tu Jahowa. Ibana do parmahan na tontong manogunogu jala
paluahon hita sian hamagoan, asa boi hita manghilalahon asi ni roha na sian
Jahowa. Marlas ni roha ma hita, ai Ibana do marmahani hita. AMEN
Tidak ada komentar:
Posting Komentar