8 Desember 2017

Yesaya 40:1-11 MENANTIKAN TUHAN


     MANOMUNOMU HARORO NI TUHAN I

PATUJOLO :
Turpukon ima barita na dihasiholhon angka jolma na adong di habuangan. Sihol roha nasida dibarita haluan, alana masa parungkilon, na ingkon malua nasida sian habuangan i. Tarsongoni ma barita ni turpukon tongon di bagasan parungkilon do bangso i di habungan Babel alani pangalaosion, na munundalhon Debata. 

HATORANG TURPUK
Nunga pola leleng bangso ni Debata di tano habuangan. Dangoldo sitaonan nasida di habuangan Babel ; nunga sega joro ni Debata di Jerusalem jala gabe hatoban nasida di habuangan i. Nunga mago ngolu panghirimon bangso ni Debata, lungun jala mangae disiala na tarbuang nasida i.
Alai parholong roha do Tuhan i maradophon bangsoNa. Disuru do naposona pasahathon apul-apul tu bangso i, asa unang mandele nasida alai gabe patubuhon panghirimon tu Debata. Barita las ni roha na ringkot patolhason naposona ima na laho marujung ma parungkilon nasida i ala nunga disesa Debata saluhut dosa nasida i. Jala jangkonon ni Debata ma nasida. Asa di naro hata ni Debata mansosoi roha nasida boi muse patubuhon panghirimon jala las ni roha. Nunga marujung be parhatobanan i. Digarar Debata do silompit saluhut dosa nasida i asa malua bangso i sian parhatobanan. Parungkilon na tinaon nasida ala ni dosana gabe disesa Debata saluhut na i. Dipalua Debata do bangsona i. Debata sandiri do marsuru naposona laho pasahathon barita nauli i tu sandok nasida na di habuangan jala begeon nasida ma i dibagasan las ni roha. Debata do mangula laho paluahon nasida sian pardangolan i. Saluhutna i asa rim nasida manomu-nomu haroro ni Tuhan i. Di naro sada raja ingkon do saluhut jolma i (rakyat) paradehon angka na ringkot. Suang
songoni do diharoro ni Tuhan i asa saluhut nasida mardalan manomunomu Tuhan i. Mardalan sian habuangan tu Jerusalem. Pardalanan i ima pardalanan hamonangan dohot pabotohon hamuliaon ni Debata.
Dijou Debata do panurirang Jesaya laho paradehon dalan tu na naeng ro i. Tung sada ulaon na borat do i dietong panurirang Jesaya, dang margogo jolma i patupahon na denggan maradophon Debata. Digombarhon panurirang i do, ia jolma i songon duhutduhut jala doshon bunga pansur hinadengganna i sudena.
Ido barita las ni roha na ingkon patolhason panurirang i asa huaso hata ni Debata i gabe pasupasu diangka jolma i di sandok portibi. Hata ni Debata ima tondi Debata na patubuhon semangat dohot panghirimon ni jolma. Ulaon panurirang i pasahothon barita : ‘ida ma, disi do Debatamuna i’. On barita las ni roha tu sandok portibi, lehononna do haluaon tu portibi on. Na ro do Ibana songon sada parmahan. Papunguonna ma angka biru-biruna, paborhatonna, jala usungonna di ampuanna, lambok do pangaduna di angka panusuan. Ditogutogu Debatama nasida tu aek na tio.
SIPAHUSORHUSORON
Hata ni Debata on paingothon hita di haroro ni Tuhan i. Naeng ma diroha ni Debata dapotonna hita mangolu dibagasan hasintongan i, asa gabe bangso na pasonangkon rohana. Parsaoran na denggan dohot Debata jala punguan na tontong dibagasan hatigoran.
Nunga ro Tuhan Jesus tu portibi on laho manesa dosanta marhitehiote mudarna na durus di hau pinarsilang i. Ima holong ni Debata na mangalehon haluaon tu jolma na di
hasiangan on. Alai dang saluhut jolma i manjangkon Jesus. Marulakulak jolma i madabu tu bagasan dosa.
Dangol do pargoluaon di hasiangan on alai satongkin do i. Paubaon ni Debata do I saluhutna gabe imbaru. Ido na tapaimaima di hasiangan on. Dina paimaimahon Kristus i, naeng ma hita tongtong benget jala dibagasan panghirimon.
Dibagasan parhuriaon nuaeng on lam godangdo hamubaon. Toropdo ruas ni huria ndang adong be biar mida Jahowa, melanggar aturan ruhutruhut ni parhuriaon, ndang mangulahon kewajiban ni parhuriaon. Torop do nuaeng ruas ni huria ; ndang hea be ro tu gareja, ndang parsidohot partangiangan, bahkan adong ruas ndang olo manjangkon partangiangan di jabuna. Didiado hahurangan ni i saluhutna ? Pangula ni huria do na hurang panogunoguon manang ruas i do naung jogal/manangkang ?
Nunga masuk hita tu Minggu Adven II, paingothon na ro ma Tuhanta na mambahen uhum tu angka hajahaton manisia. Dibahen i, ringkot hita paubahon rohanta, manghabiari Jahowa. Tatadingkon angka langgus ni rohanta, alai naeng ma hita lam ringgas mangulahon na dihalomohon Debata. Naeng ma hita mangolu dibagasan hatigoran. Songgop do tondi ni Debata tu bagasan rohanta, alai boha do hita manjangkon Tuhan i ?
Didok Matius 5:8 : ‘Martua ma parroha na ias, ai idaonasida do Debata’. Tapaias ma rohanta asa tongtong hita diparorot Debata di nasa gulmit ni ngolunta. Unang ma pola hita mabiar ala peraturan ni huria, alai naeng ma hita biar mida Jahowa. Ingkon songoni do hita manomunomu haroro ni Tuhanta dibagasan hatigoran, asa lehonon ni Debata ma haluan tu hita saluhutna. Jala marhitehite sisongonido gabe marlas ni roha hita manghalashon ari hatutubu ni Tuhan i. AMEN

Artikel Terkait



Tidak ada komentar:

Posting Komentar