1 Petrus 2:19-25 (Minggu Jubilate)

BENGET MA HAMU MANAON (1 Petrus 2:19-25)

Nunga somalbe diparngoluan on molo masa hajahaton dibalos  mause mardongan hajahaton. Na unik ima songon na didok hata ni Debata (Rom 12:21) : ‘Unang ma talu ho dibahen hajahaton; alai taluhon ma hajahaton i marhitehite na denggan!’ Dang tarula i, ninna rohanta do ra, alai memang ingkon songoni do parbue halak na porsea tu Debata. Hombar songoni do pangajarion si Petrus do turpukta on. Adong dua bagian na laho idaonta dibagasan turpuk on songon pangajarion dohot panindangion sian si Petrus, naposo ni Tuhan Jesus.

Asa sitindangi

Nunga lam berkembang (marserak) be hakristenon, dang holan halak Jahudi alai nunga parsidohot angka na so halak Jahudi. Nunga torop halak na imbaru siihuthon Tuhan Jesus. Songon siihuthon ugama na imbaru, ro do angka sitaonon tu nasida, sogo ni roha sian sisolhotna suang songoni nang sian masyarakat. Dihasogohon do nasida. Alani i do disangkapi si Petrus mambahen poda tu nasida asa margogo jala imbar nasida sian ugama naung ditinggalhon, laho mangadopi hamaolon. Songon dia do nasida mangadopi angka hamaolan na songgop tu parngoluan nasida. Diturpuk on dipataridahon sada na masa molo ro pangunjunan manang parungkilon i.

Manaon uhuman hombar tu hajahaton patutna do jaloonta, ai i do uhum ni haportibion. Alai boha do molo ditaon halak arsak ni roha ala dihonai tu ibana angka na so uhum ? Nda patutna do baloson ni jolma i ? Alai dipodahon apostel Petrus diturpuk on, asa unang dibaloshon i. Molo ro arsak tu parngoluon halak na porsea, ingkon ingot do di Tuhan i. Marhitehite ingot tu Tuhan, Na gabe margogo ma hita manaon arsak na dipatubutubu dongan jolma. Dihagogoon manaon arsak i, lumobi ala mangulahon ulaon na denggan, ido na digoaro asi ni roha. Didok asi ni roha, ala sasintongna nunga mate be jolma i binahen ni dosana. Holan umbahen asi ni roha Tuhan Jesus Kristus sambingdo gabe dapotta hangoluan dohot haluaon i. Ima asi ni roha Kristus na nilehonNa tu jolma i. Saluhutna on gabe ojahan haporseaon dohot panghirimon, dohot panjouon asa mangolu dibagasan habadiaon dohot holong ni roha. Ido tanda halak naung mangolu dibagasan haimbaruon, maninggalhon ugama na salpu. ‘Ai songon birubiru na lilu do hamu najolo; alai nunga didompakkon hamu nuaeng Parmahan i, na manganahon tondimuna’ (ay.25).

Panaonan ni Tuhan Jesus

Solhot do si Petrus tu guruNa, Jesus. Diihuthon si Petrus do Tuhan Jesus diangka pardalanan/pelayanan sian Yudea sahat tu Jerusalem. Godangdo diida si Petrus angka halongangan na pinatupa ni Tuhan Jesus. Saluhutna na niida si Petrus i gabe patubuhon partondionna, patoguhon haporseaonna do i. Marolopolop do tondi si Petrus saleleng rap dohot Tuhan Jesus. Parngoluon ni partondion si Petrus na umbalga, na gabe halongangan bolon di ibana ima ditingki parsidohot ibana marnida ujung parngoluon ni Jesus di portibi on. Ditaon Tuhan Jesus do parungkilon bolon alani dosa saluhut jolma.

Diida si Petrus do Jesus manaon na dokdok di  taman Getsmani. Diida do ditijuri, ditompuk, dilinsingi, disiksa, dibahen marsaemara. Diida do Ibana manuhuk silang mamolus dalan na maol i. Diida do mudarNa tiris manggohi portibi on. Diida do Ibana tarsilang ditongatonga dua halak parjahat. Digarar Tuhan Jesus do saluhut utang dosa ni manisia, dibagasan parungkilon na bolon i, di hau pinarsilang. Mate do Jesus. Saluhutna angka na masa i diadopi Jesus bahen hasesaan dosa dohot haluan ni manisia. Manghaporseai hasesaan ni dosa ido na gabe dalan tu angka na porsea asa parsidohot nasida di harajaon ni Debata. Ganup halak naung manjalo hasesaan ni dosa dibagasan haporseaon gabe parsidohot ma nasida maniru pambahenan ni Tuhan Jesus. Hasesaan ni dosa naung dipanghilalahon si Petrus laos i do ojahanna laho manghatindangkon Tuhan Jesus, mangkaholongi dongan jolma..

Songon halak naung porsea tu panaonon ni Tuhan Jesus, hita pe ringkot manghatindangkon hamatean i tu saluhut halak. Panaonon dohot hamatean ni Tuhan Jesus boi tahatindangkon marhitehite roha, pangalaho, dohot pambahenan nahinalomohon ni Tuhan Jesus. Dibahen i, halak naung porsea ndang be mangulahon hajahaton laho mambalos na jat. Alai naeng ma saluhut angka na porsea i mambolongkon saluhut pangalaho na roa dibagasan hadirionna. Asa marhite i, gabe sitiruon ma hita ditorop halak, na gabe mambahen torop jolma lam porsea tu Tuhan Jesus jala parsidohot mandai angka asi ni rohaNa.

Hamatean ni Kristus gabe sada alus do i dihita angka na porsea laho mangadopi saluhut hamaolon na masa dingolunta. Molo pe tung godang angka parungkilonta di portibi on, taadopima i dibagasan panghirimon. Asa panaonan ni Tuhan Jesus mangalehon sada pikiran na imbaru di hita laho mangadopi angka na masa (realitas) dibagasan ngolunta siganup ari. Marhitehite maniru parmahanion ni Tuhan Jesus gabe margogo hita mangadopi ngolu on jala nunga parsidohot hita gabe parmahan diangka dongan jolma, asa parsidohot nasida mar las ni roha, parjambar di harajaon ni Debata.

Minggu JUBILATE, marlas ni roha ma hamu. Tung pe dibagasan ragam hamaolan hita, alai songon halak na porsea ingkon do tontong hita marlas ni roha. Marlas ni roha ditonga-tonga rumatangga, keluarga, parkarejoan, parsahutaon, lumobi ma tutu di hurianta. Patutna do hita marlas ni roha menyambut lima pulu taon naung jongjong huria GKPI. Las ni roha i boi tapangkilalahon molo saluhut ruas dohot pangula ni huria mambahen Jahowa gabe parmahan dingolunta. Dibagasan parmahanion ni Jahowa, marsada ni roha hita paherbangkan huria ni Tuhanta GKPI tu sandok luat portibi on mardongan las ni roha. AMEN

Artikel Terkait