Efesus 5:1-10 ANAK TERANG

       HIDUP SEBAGAI ANAK TERANG

PATUJOLO

Adongdo tujuan ngolu ni halak Kristen. Alai andorang so sahat tu tujuan i, ingkon taridado parngoluon halak Kristen i hombar tu tujuanna i. Tujuan ni halak Kristen ima harajaon ni Kristus dohot Debata (ay.5). Di harajaon i ndang adong siteanon ni parmainan manang parhodar, manang parroha na ahut. Dibahen i, saleleng paimahon harajaon i, ingkon do padaohonon pangalaho sisongoni, asa sahat tu tujuan i.

HATORANGAN TURPUK

(ay. 1 – 2) Pondasi ngolu halak na porsea

Ngolu ni halak Kristen dibagasan holong do ; holong ni Debata maradophon Kristus, jala holong ni Kristus tu angka jolma i. Dihaholongi Kristus do hita marhitehite dilehon dirina humongkop jolma i, asa malua jolma i i sian hurungan ni dosa i. Holong ni Kristus i gabe pelean uap na hushus, na dihalomohon Debata.

Laos songon i do ma nian jolma i maradophon donganna, asa naeng marsihaholongan. Jolma na mangkaholongi donganna do na targoar mangkaholongi Debata. Jala ido dihalomohon Debata dibagasan parsaoran ni angka na porsea i.

(ay. 3 – 7) Pangalaho jolma portibi

Ragam do pangalaho ni jolma dihasiangan on. Angka pangalaho na so porsea gok do angka parmainanon (percabulan) dohot ragam ni harorangon (kecemaran) ro di pangahution (keserakahan). Pangalaho halak sisongoni ima angka halak na so porsea ; ndang porsea nasida di angka ari sogot ; panguhuman manang hangoluon salelenglelengna. Holan ngolu haportibion on do na boi dirimangrimangi nasida.

Jala halak na so porsea i ndang adong kemampuan manjaga angka hatahata na boi manghorhon sihailahononhon (kotor), hata barangsi (kosong) dohot pargaitgaiton na so patut (sembrono). Sian hatahata nasida pataridahon haginjangon ni rohana. Ndang dihalomohon Debata angka hata sisongoni jala boi do i parohon rimas ni Debata.

(ay. 8 – 10) Pangalaho halak na porsea

Memang, ruas ni huria Epesus i pe na jolo dibagasan haholomon do. Sada masyarakat na mangolu dibagasan angka hahurangan parbinotoan gabe mangolu dibagasan haholomon. Alai nuaeng nunga dijalo nasida Kristus i, gabe diida nasida hatiuron i, diboto na denggan dohot na roa.

Asa naeng ma tutu ngolu ni halak naung porsea, ingkon marparange dibagasan hatiuron. Ndang adong ulaon na bunibuni (hagolapon). Adong tolu na ringkot ulahonon ni angka anak hatiuron, ima ; habasaon (kebaikan), hatigoran (keadilan), dohot hasintongan (kebenaran). Mangulahon angka sisongoni ndang porlu bunibuni manang mabiar.

Songon halak na porsea, boi do hita manimbangnimbangi (manangkasi) angka parangenta ganup. Boido botoonta parangenta na denggan manang na roa. Molo tung adong dope parangenta na roa tapadao ma i sian dirinta, ai ndang dihalomohon Debata angka i. Naeng ma hita mangolu dibagasan hatiuron i, ai ido dihalomohon Tuhanta. AMEN

Artikel Terkait